Sandfell er byggt árið 1898 af Guðmundi Guðmundssyni, áður bónda á Efra-Seli. Um nafn þessa býlis er þess að geta, að framan af er það ritað Sandfell, enda verður það að teljast hið rétta nafn. Á seinni tímum er alla jafnan ritað Sandferl, sem er auðsæ málleysa, eða jafnvel Sandferill, sem er tilraun til að leiðrétta þá málleysu.
Sanda er nefnd fyrst árið 1824 í sambandi við lát Jóns Brandssonar yngra frá Roðgúl, er andaðist þar. Mun Jón og síðan ekkja hans, Guðný Jónsdóttir, hafa búið þar á árunum 1823-25 og byggt þar fyrst.
Pálshús voru kennd við Pál Stefánsson, er byggði þar árið 1891. Þau fóru í eyði 1931, og bjó þar síðast Jóhann Jónsson, áður bóndi á Grjótlæk.
Pálsbær mun vera kenndur við Pál Gíslason Thorarensen frá Ásgautsstöðum. Nafnið kemur fyrst fyrir í formannavísum frá 1891 og er upphaflega sami bær sem Tjörn, sjá þar.
Pálmarshús er kennt við Pálmar Pálsson bónda á Stokkseyri, er byggði það um 1911-12, en nafnið höfum vér séð fyrst í manntali 1940. Þar hefir Þorkell Guðjónsson rafveitustjóri búið í mörg ár.
Ólafsvellir (stundum ritað Ólafsvöllur) eru byggðir árið 1899 af Ólafi Sæmundssyni frá Húsagarði á Landi og við hann kenndir. Ólafur var bróðir þeirra Filippusar í Klofa og Hafliða á Fossi. Hann bjó síðar á Melabergi á Miðnesi.
Ólafshús var kennt við Ólaf kaupmann Árnason, er byggði það um það leyti sem hann settist að á Stokkseyri 1895 eða næsta ár. Var það bæði verzlunar- og íbúðarhús Ólafs. Hinn 1. febr. 1907 seldi Ólafur kaupfélaginu „Ingólfi“ húsið og verzlunina. Eftir það bjó Helgi Jónsson verzlunarstjóri í húsinu allt til þess, er hann fluttist
Nýlenda var þurrabúð í Traðarholtslandi. Hún var einnig kölluð Litla-Árnatóft og stundum í gamni Upphleypa. Var það nafn dregið af því, að kotið var hækkað upp, vegna þess að vatn flæddi inn í það. Nýlendu er getið á árunum 1888-92, og bjó þar þá Eiríkur Arnoddsson, áður bóndi í Ranakoti efra. Aftur var Nýlenda í
